ރިސޯޓް ލީގް 2024: ފަހަތުން އަރާ ހިލްޓަންގެ މައްޗަށް ބަނޑޮސް އިން ކުރި ހޯދައިފި

ރިސޯޓް ލީގް 2024 ނޯތް މާލެ ޒޯންގެ ގުރޫޕް އޭ ގައި މިއަދު ބަނޑޮސް އަދި ހިލްޓަން ބައްދަލުކުރި މެޗުން ފަހަތުން އަރާ ހިލްޓަންގެ މައްޗަށް ބަންޑޮސް މޯލްޑިވްސް އިން ކުރި ހޯދައިފިއެވެ.

ވާދަވެރި ކުޅުމަކަށްފަހު ފުރަތަމަ ހާފް ނިމުނީ ދެ ޓީމުން ކުރެ އެއް ޓީމަކަށް ވެސް ލަނޑެއް ނުޖެހިއެވެ. ނަމަވެސް ދެވަނަ ހާފް ފެށިގެން ފުރަތަމަ މިނަޓްގައި ހިލްޓަން އިން ވަނީ ލަނޑެއް ޖަހާ ލީޑް ނަގާފައެވެ.

މެޗް ނިމެން މިނަޓަކަށް ވެފައި ވަނިކޮށް ބަނޑޮސް އިން ވަނީ ލަނޑެއް ޖަހާ ނަތީޖާ ހަމަހަމަ ކޮށްފައެވެ. ބަނޑޮސްގެ ފުރަތަމަ ލަނޑު ޖަހާފައި މާގިނަ އިރުތަކެއްނުވެ އެ ޓީމުން ވަނީ 2 ވަނަ ލަނޑު ޖަހާ މެޗްގެ ލީޑް ނަގާފައެވެ. މި މެޗްގެ މޮޅު ކުޅުންތެރިއަކަށް ހޮވިފައިވަނީ ބަނޑޮސްގެ ޖާސީ ނަންބަރު 10 އިބްރާހީމް މުޝީރު އެވެ.

ނޯތް މާލެ ޒޯންގެ ގުރޫޕް އޭ ގައި މިއަދު ކުޅުނު 2 ވަނަ މެޗުން ރީތި ރަށް ވަނީ 1-2 ގެ ނަތީޖާ އަކުން ކުޑަ ހުރާގެ މައްޗަށް ކުރި ހޯދާފައެވެ. މި މޮޅާއެކު ރީތި ރަށް ވަނީ މުބާރާތުގެ ދެވަނަ ބުރަށް ދަތުރުކޮށްފައެވެ.

ކުޑަ ހުރާ އަދި ބަނޑޮސް ބައްދަލު ކުރި މެޗުން 3-6 ގެ ނަތީޖާ އަކުން ކުޑަ ހުރާ މޮޅުވި ނަމަވެސް، އެޓީމުން މުބާރާތުގެ ގަވާއިދާ ހިލާފަށް ކުޅުންތެރިން ހިމެނުމާ ގުޅިގެން އެމެޗުން ލިބުނު 3 ޕޮއިންޓާއި ފައިދާ 2 ގޯލް ވަނީ ބަންޑޮހަށް ލިބިފައެވެ. އެހެން ކަމުން ބަނޑޮސް ވަނީ 6 ޕޮއިންޓާއެކު ދެވަނަ ބުރަށް ދަތުރު ކޮށްފައެވެ.